Trak nahug sa pangpang; 4 patay, 10 nangaangol
-A A +AWednesday, July 4, 2012
TACURONG CITY -- Upat ka tawo ang namatay ug napulo ang nangaangol human mahulog sa pangpang ang dump truck alas 4:30 niadtong Martes.
Mga namatay giila nga sila Fennie Tecson, Flordelize Binas, Joyjoy Samillano ug Bonbon Binas.
Nangaangol sab sila Robert Valderama, Lucrecia Depeta, Erik John Rey Arisola, Margelyn Ogatis, Alberto Teczon, Connie Samillano, Esperanza Panes, Cherry Samillano, Ronnie Beradia ug Alejandro Beradia, pulos mga molupyo sa siyudad sa Koronadal.
Gibutyag ni 6th Infantry Division Public Affairs chief Colonel Prudencio Asto nga ang mga biktima mihatud sa lubong sa ilang paryente sakay sa dump truck nga dunay plaka numero MBR 092 didto sa Lebak, Sultan Kudarat.
Apan sa dihang namauli na padung sa Koronadal, samtang gilatas sa trak ang Sitio Cocob, Barangay Kuya, South Upi, Maguindanao kalit nga nawad-an kini ug preno, hinungdan nga midiretso ang trak sa kilid sa dalan ug nahulog sa pangpang.
Ang mga naangol dali nga gidala ngadto sa Lebak District Hospital samtang ang uban gibalhin sa Cotabato Regional and Medical Center sa siyudad sa Cotabato tungod kay talandugon ang ilang kahimtang.
Nasayran nga ang dump truck gipanag-iyahan sa kagamhanang probinsiyal sa Sultan Kudarat nga maoy gisakyan sa mga biktima.
Ng kapulisan padayon nga mihimo ug imbestigasyon sa maong aksidente. (Edgardo Fuerzas)
Gipatik sa mantalaang SuperBalita Davao Hulyo 05, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
