Lider sa squatters giaresto
-A A +ANi Alger Dura
Monday, July 9, 2012
MALAMPUSONG nasikop ang lider sa mga tawong giingon nga professional squatters kagahapon didto sa Victoria Village, Barangay Matina Aplaya, siyudad sa Davao.
Gisikop alas 10:00 sa buntag mao si Manolito Gavas, hamtong ang pangedaron, lumad nga taga Bohol.
Si Gavas gisikop ni Police Superintendent Dionisio Abude, hepe sa Talomo Police Station.
"Pag-abot nako didto sa area, wala dayon nako siya makita kay gitagoan siya sa ilang mga kauban. Maayo nalang gani kay naay naka-identify sa iyaha mao tong ako siyang gipangitaan og papeles," suma ni Abude dihang nahinabi sa Radyo Arangkada ug SuperBalita.
Si Abude nagkanayon nga way gikapakita nga papeles nga nagpamatuod nga sila ang legal nga nanag-iya sa luna mao nga iyang gipadala sa presinto sa Talomo.
Base sa ilang gipakita nga dokumento, ang suspek maoy tsirman sa Veterans Legionnaries of World War of the Walter Cushing Guerilla Unit Inc.
Ang address sa buhatan sa maong grupo nahimutang sa Arroyo Compound, Barangay 74-A Matina Crossing, ning siyudad.
Unang nagpadayag nga ipadakop si Gavas mao si Davao City Vice Mayor Rodrigo Dutertes.
"If there is somebody nga naloko, you go to me and I will personally arrest the guy," suma ni Duterte sa programang Gikan sa Masa, Para sa Masa.
Si Matina Aplaya Kapitan Jimmy Poliquit nagbutyag sa SuperBalita nga gidemolis na ang mga sakop ni Gavas didto Victoria Village nga gipanag-iyahan ni Victoria Reformina.
Ang pag-demolis gihimo human nagmando si Mayor Sara Duterte-Carpio ngadto sa Demolition Team sa City Engineer's Office.
Mitambong sa maong demolisyon mao ang mga opisyales sa City Housing Office, City Building Official.
Ang mayor nagbutyag nga kon way mobarog nga complainant batok kang Gavas, siya ang mopasaka og kaso tungod kay gigamit niini sa iyang pagpangilad ang siyudad sa Davao.
Misud ang mga tawo sa Victoria Village human nailad ni Gavas pinaagi sa gipakitang desisyon sa Supreme Court niadtong 1998 nga nagpabor kanila nga makaangkon og daghan luna sa Pilipinas lakip na ang yutang gipanag-iyahan sa gobyerno.
Samtang gisuwat kining maong balita, gihikay na ang kasong trespassing, malicious mischief, robbery ug grave threats, suma ni Abude.
Gipatik sa mantalaang SuperBalita Davao Hulyo 10, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
