Nangarnap og kotse gilutos

PADAYON pa ang paglutos sa kapulisan sa usa ka lalaki nga nangarnap og kotse didto sa ikaduhang andana sa parking lot sa mall sa dalang JP Laurel Avenue, siyudad sa Davao.

Nahitabo ang insidente alas 4:00 sa hapon niadtong Dominggo sud sa Gaisano Mall of Davao base sa blotter sa Sta. Ana Police Station.

Sa gihimong imbestigasyon, nasayran nga unang gibiktima sa suspetsado si Cherie Esios Butuanon, 23, dalaga, usa ka nurse ug residente sa Sto. Nino Village, Maa, ning dakbayan.

Sumala pa nga pasulod na unta si Butuanon sa iyang sakyanan nga Honda City, nagdala sa plakang numero XCB-751 sa dihang kalit nga mipatim-aw ang lalaki ug kalit nga misulod sa back seat sa sakyanan ug gibira ang iyang buhok.

Daling migawas si Butuanon ug misiyagit nga nangayo og tabang nga maoy nakadani sa atensiyon sa duha ka mga guwardiya sa maong mall.

Gigukod sa mga sekyu ang lalaki kinsa dali nga nakailog og kolor puti nga Mitsubishi Colt nga kotse, nagdala sa plakang numero MEB-947 nga gimaneho ni Gavin Leo Anto Gumba, 23, ulitawo, call center agent ug taga Block 2, Lot 39, Door 1 Apartment Builoding, Duplex Street, Lanang.

Si Gumba sakay niadtong tungura sa kotse kauban ang upat niya ka mga higala.

Gipugos sa pagpagawas sa suspetsado sila Gumba sa sakyanan apan gidala ni Gumba ang yawe sa kotse sa ilang paggawas hinungdan nga nagbinugnoay ang lalaki ug ang guwardiya nga naila sa apilyedong Domanico.

Mihulbot ang suspetsado og wala matinong kalibre sa pistola hinungdan nga midagan ang sekyu aron nga kuhaon ang iyang pusil nga shot gun.

Sa ikatulong higayon, pugsanong gisulod sa lalaki ang usa ka kolor bluish/silver nga Honda Civic, nagdala sa plakang numero ZKW-133 nga gimaneho ni Dante Adarayan Fabian, 33, minyo, negusiyante ug taga #139, Daffodil Street, Alpha Homes, Matina kon diin kauban pod niadtong tungora ang iyang asawa.

Gitutukan si Fabian ug asawa og pusil sa suspetsado ug gimandoan nga mogawas sa sakyanan.

Sa kahadlok nga pusilon, daling mikanaug sa sakyanan ang magtiayon ug gidala sa suspetsado ang sakyanan.

Paggawas sa exit nga bahin sa parking lot sa maong mall, gipabuthan ang suspetsado ni Domanico sa dala niyang shot gun makaduha ka higayon punting sa wala ug likod nga bahin sa sakyanan.

Apan nakasibat gihapon ang suspetsado padulong sa dalang de Guzman ug Obrero ning dakbayan sakay sa sakyanan.

Sa pagsulat ning balita, ang kapulisan sa Sta. Ana PNP misusi na sa closed circuit television camera sa mall aron nga mailhan ug madakpan ang karnaper. (Blue Cordero)