Daneco: 57 suspendidong empleyado gibalik na

DAVAO DEL NORTE - Gipabalik na sa ilang trabaho ang 57 ka mga empleyado sa Davao del Norte Electric Cooperative (Daneco) human sa pipila ka adlaw nga pagtuman sa 30-diyas nga suspension niadtong miaging semana.

Nakabalik sila human opisyal nga gianunsiyo kini ni Compostela Valley Governor Arthuro Uy niadtong Lunes atubangan sa tanang empleyado sa buhatan sa Daneco didto lungsod sa Montevista.

Ang pahayag sa gobernador gibasa ni Provincial Administrator Vergie Allones atol sa ilang Monday convocation.

Unod sa mensahe ni Uy ang resulta sa ilang nahisgutan ni Department of Energy Secretary Rene Almendras ug Department of Interior and Local Government Secretary Jessie Robredo didto sa kauluhan niadtong Hulyo 6.

Giingon nga mihangyo si Almendras kang Uy nga mo-interbenar, moresolba ug mangitag pamaagi nga mahupay ang tensyon sa mga opisyales ug labaw sa tanan mapabalik ang pagsalig sa katawahan ngadto sa Daneco.

Suma sa mensahe ni Uy nga hugot ang iyang adbokasiya sa maayong panggobyerno, apan gitawag siyang hilabtanon sa kalihukan sa Daneco.

Gipasabot sa gobernador ang mandato ilawom sa batakang balaud nga magsiguro nga ang public utilities nga naghatag serbisyo sa katawhan apil ang Daneco.

Giklaro ni Uy nga karong higayuna dili una hisgutan kon para sa Cooperative and Development Authority (CDA) o National Electrification Administration (NEA), kinsay midaug o napildi sa referendum.

"It is about time that we need to talk how we can help Daneco move on in the proper course. After our conscientious discussions with the two secretaries, may I formally render my official statements regarding the issue at hand," pung ni Uy.

Gipahibalo niya nga si NEA project supervisor Evangelito Estaca ug OIC-General Manager Rey Bandala mosugod dayon pagdumala sa operasyon sa Daneco.

Giawhag sab niya ang tanang board of directors nga tumanon ang balaod ug di una mohimo sa ilang trabaho aron malikayan ang tensiyon.

"May I request that all 12 Board of Directors and OIC General Manager Felix Hibionada to refrain from holding office until all issues are resolved," hangyo ni Uy.

Sa bahin sa 57 ka mga empleyado nga gipailawom sa preventive suspension, gimandoan sa gobernador si OIC General Manager Bandala pabalikon na sa trabaho.

"Finally, may I sternly request and stress for all the officials, management, employees of Daneco and everybody to refrain from issuing unnecessary statements, malicious accusations and all sort of speculations about Daneco," panapos sa gobernador.

Nanghinaut siya nga pinaagi niini makabaton og mas epektibong serbisyo sa katawhan sa Daneco.

Alas 10 kagahapon sa buntag miabot sa Daneco Tagum Office sila NEA administrator Editha Beuno, PS Estaca ug DOE Undersecretary Ina Magpale Asirit.

Nakigpulong sila sa tanang mga empleyado bahin sa bag-ong katikaran sa operasyon sa kooperatiba. (Teddy Cabana)