Pagtukod og kampo gihimakak sa Army

BANSALAN, Davao del Sur - Gilimod sa usa ka opisyal sa 39th Infantry Battalion (IB) sa Philippine Army nga nagtukod sila og kampo sa pampublikong lugar didto sa Sityo Kurbada, Barangay Poblacion Uno.

Si First Lt. Joel Calusing, commanding officer sa Alpha Company sa paghinabi sa Superbalita ug DXND-Kidapawan, nga wala sila magkampo ug temporaryo lang nga nag-estar sa Nakayama Police Outpost sa maong barangay.

"Tatlong buwan lang kami dito pero hindi nagkakampo dito," tin-aw ni Calusing ug dugang nagkanayon nga mobalhin sila og laing lugar kung mahuman na ang ilang Peace and Development Team Outreach Program (PDOP) sa mga kabarangayan sa maong lungsod.

Nabalaka ang ubang sibilyan nga nanimuyo duol sa lugar nga basin kon mapagan kung hayan sulungon sa mga rebeldeng New People's Army (NPA) ang dapit ilabi pa nga duol sila sa national highway.

"Nag-paalam din kami sa Bansalan police na dito muna kami makisilong hanggang di pa tapos ang PDOP," dugang ni Calusing.

Sayo niini, giklaro sa 10th Infantry Division sa Philippine Army (PA) nga di mamahimong mag-kampo ang mga sundalo sa mga pampublikong lugar.

Si Col. Yerson Depayso, 10th ID assistant commander, nagbutyag nga ang pag-kampo sa mga tunghaan, barangay halls, ug uban pang pampublikong lugar wa nila gitugot.

Gipaklaro sab sa opisyal nga nasayop ang uban sa pagtuo nga ang PDOP gitumong sa mga barangay nga impluwensiyado sa mga rebeldeng NPA.

Ang kasundalohan nga sakop sa PDOP naglantaw sa mga suliran sa katawhan sa bukid sama sa kakuwang sa tubig, tulay, tunghaan, magtutudlo ug uban pang mga panginahanglanon sa katawhan.

Dugang tumong sa PDOP nga ubanan ang lokal nga gobyerno sa pagsaka sa bukid aron mahatud ang mga serbisyo sa katawhan sanglit ang uban nahadlok nga mosaka ilabi pa kung iladong balwarte sa mga NPA ang usa ka lugar. (Orlando B. Dinoy)