RMN Davao giwelgahan sa mga empleyado

NANGMINGHOY ang mga suking tigpaminaw sa Radio Mindanao Network (RMN) - DXDC Davao sanglit wa na makatingog ang ilang paboritong sibyahan human nagwelga ang mga sakop sa RMN Davao Employees Union (RDEU) kagahapong adlawa.

"Amo nang gikasa ang welga karong adlawa kay wala man gituman sa kompanya ang among collective bargaining agreement (CBA)," pahayag ni RDEU president Rey Fabe dihang gihinabi sa Radyo Arangkada.

Si Fabe nagkanayon nga ilang gihimo ang welga aron mapugos ang mga opisyales sa kompanya nga ihatag ang ilang gipangayo nga benepisyo.

"Nagpursige ang unyon sa pagpadayon sa CBA. Wala magkulang ang RDEU pagpahinumdom ngadto sa management pinaagi sa mga sulat ug pipila ka mga verbal reminders," pahayag ni Fabe.

Siya nagkanayon nga wa girespeto sa RMN management ang MOA kay matud pa nila, rebyuhon pa ang mga nahiusahan sa MOA nga gipirmahan sa sa duha ka mga personalidad nga gihatagan og otoridad sa RMN Board of Directors.

"Asa naman ang baruganan sa presidente sa kompnayang RMN nga si Eric Canoy nga siya man ang nagkarakara pagpapirma sa maong MOA niadtong Nobyembre 11 ug gipirmahan nila Mr. Leobrado Daugdaug ug Atty. Martin Johnson Heje?" pangutana ni Febe.

Ang tagdumala sa RMN gitawag nilang hakog tungod kay mikita og P24-milyones ang kompanya matag buwan, apan nagdumili kini pagpausbaw sa suhulan nga mokantidad lamang og P99,000 matag bulan alang sa tanang trabahante sa Davao.

Ang unyon nanghingusog nga ipatuman ang probisyon sa MOA ug ipadayon ang negosasyon alang sa ikaduha ug ikatulong tuig nga usbaw sa suhulan ug mga nahibilin nga hisgutanan alang sa CBA.

Wa pa masayri kon kanus-a matapos ang welga sa unyon, samtang wa pa sab makuha sa Superbalita ang pahayag sa tagdumala sa RMN. (Alger P. Dura)