Dalagita gidagit
-A A +ASunday, July 15, 2012
USA ka lalaki ang nasikop sa kapulisan sa Tugbok human gidagit ang usa ka dalagita alas 8:00 sa buntag niadtong Sabado.
Nahitabo ang pagkasikop didto sa Barangay New Carmen, Tugbok District, siyudad sa Davao.
Ang suspek mao si Hilarion Entero Capute, 31, ulitawo, laborer, ug nagpuyo sa nahisgutang lugar.
Si Capute maoy nagdagit biktima nga si Liza (tinuod pangalan gitago sa Superbalita), 17, out of school youth, ug silingan sa suspek.
Base sa imbestigasyon sa kapulisan, alas 9:00 sa buntag niadtong Hulyo 10 nagkabo og tubig ang biktima apan kalit siyang gibira sa suspek, gitionan og pusil dayon gidala sa balay sa suspek.
Sayo sa buntag niadtong Sabado nakadawat og tawag ang kapulisan sa Tugbok gikan kang Kapitan Antonio Tabar sa Barangay New Carmen, Tugbok District.
Ang kapitan nagtaho nga dunay nahitabong kidnapping sa iyang lugar.
Daling miresponde ang kapulisan sa maong lugar diin malampusong naluwas sa kapulisan ang biktima ug nadakpan ang suspek.
Nakuha gikan sa suspek ang usa ka kalibre .38 nga rebolber.
Gihulat pa sa kapulisan ang resulta sa Medico Legal Examination sa biktima para masayran kung gilugos ba kini samtang anaa sa poder sa suspek. (Blue Cordero)
Gipatik sa mantalaang SuperBalita Davao Hulyo 16, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
