'Gupitan sa Super B' libreng idalit sa barangay

ANG Sun.Star Davao Publishing Inc. nagpahibalo nga andam na ang Gupitan sa Super B -- usa ka aktibidad nga ilusad atol sa ika-13 ka tuig nga kasumaran sa Superbalita.

Ang Gupitan sa Super B himuon karong Hulyo 22 (Dominggo) sa Barangay Rafael Castillo, Agdao District, siyudad sa Davao.

Ang maong aktibidad idalit nga libre sa Superbalita ngadto sa mga suki nga kanunay nagsunod pinaagi sa pagbasa sa ning maong mantalaan.

"Dako namong garbo nga dinhi sa among barangay himuon ang Gupitan sa Superbalita," pahayag ni Kapitan Mar Masanguid.

Ang barangay council ubos sa liderato ni Masanguid siyento porsiyentong misuporta sa maong aktibidad alang sa ilang mga constituents.

Tungod niini, isip partner sa maong aktibidad, motabang ang barangay sa pagpahibalo sa ilang katawhan nga mo-avail sa maong programa.

Gawas sa pagpahibalo sa katawhan, ipagamit sab sa barangay ang ilang mga pasilidad lakip na ang mga staff nga moayuda sa mga personahe sa Superbalita.

Ang aktibidad mahimong malampuson pinaagi sa tabang sa Arlyn L. Basquez Academy of Beauty, Inc.

"Nagasuporta gyud mi sa mga community outreach program especially sa Gupitan sa Barangay," matod ni Arlyn Basquez, proprietor sa ALB Academy.

Si Basquez malipayon nga nahimong partner sa Superbalita sa pagserbisyo sa katawhan sa barangay.

Mga residente libre unyang gupitan sa mga estudyante sa ALB Academy ug mga ekspertong personahe sa Arlyn L. Basquez Salon.

Ang Gupitan sa Super B kabahin sa tinuig nga corporate social responsibility program sa Sun.Star Davao Publishing Inc. alang sa mga suking mambabasa. (Alger P. Dura)