Nagtong-its nakigpinusilay sa pulis, patay

PATAY ang usa barker nga nagdula lamang og tong-its human makigpinusilay sa kapulisan sa Santa Ana Police Station alas 4:30 sa hapon niadtong Sabado.

Ang insidente nahitabo sa San Roque Street, Riverbed, Barangay 22-C, Boulevard, syudad sa Davao.

Naila ang ang maong barker nga si Ryan Taruja, alyas Tasio, 30, dunay kapuyo ug taga Block 1, Barangay 22-C, Boulevard.

Sa blotter sa kapulisan, nasayran nga adunay usa ka concerned citizen ang mitawag sa ilang buhatan ug nagpahibalo nga adunay lalaki nga nagtakin ug armas samtang nagsugal sa panimalay ni Gudiano Fuentes.

Daling miresponde ang kapulisan sa Santa Ana nga gipangulohan ni Police Senior Inspector Ronald Lao.

Sa ilang pag-abot sa lugar, nagkabuang og sibat ang mga nagsugal apan nagpabilin ang suspek nga milanit sa iyang .38 nga rebolber ug gipabuthan ang mga pulis.

Mibalos ug pabuto ang mga pulis ngadto sa suspek.

Nakahiagom ang suspek og duha ka samad pinusilan sa iyang lawas hinungdan sa kamatayon niini.

Nasayran nga nalambigit si Taruja sa serye sa pagpang-hold-up, ug usa na niini ang Convenience store sa Aurora Street niadtong Abril 16 ning dakbayan.

Siya usab ang mitulis sa Gwen Internet Cafe nga nahimutang gihapon sa dalang Aurora niadtong Hunyo 1.

Narekober sa mga Scene of the Crime Operatives (SOCO) ang usa ka kalibre .38 nga rebolber nga walay serial number nga dunay upat ka mga buhing bala.

Anaa karon gihaya si Taruja sa Angel Funeral Homes sa dalang Torres ning dakbayan. (Blue Cordero)