2 anyos nalitson

DIGOS CITY - Usa ka 2 anyos ug upat ka bulan nga batang lalaki ang napaig human nga gilamoy sa kalayo ang ilang payag didto sa Sityo Power, Barangay Tres de Mayo, alas 11:00 ang takna sa buntag niadtong Dominggo.

Ang biktima nga si John Rey Torres, gibiyaan sa inahang si Nora, 24, nga natulog sud sa maong payag.

Base sa imbestigasyon ni Supt. Solomon de Castilla, hepe sa Digos City Police Office (DCPO), nagkabo og tubig ang inahan sa bata mga 60 ngadto 80 metros ang gilay-on gikan sa ilang pinuy-anan.

Nakurat na lang ang inahan sa bata kay sa iyang pagpauli nagdilaab na ang kusog kaayong kalayo ug paspas nga gilamoy ang ilang payag.

Ang inahan nga naratol sa insidente nakahimo pa pagluwas sa 9 ka bulang anak nga lalaki kinsa natulog sa duyan apan pakyas nga maluwas ang 2 anyos nga anak.

Sumala sa kapulisan, mibalik pa ang inahan ug gisulayan pa og luwas ang anak apan tungod sa kainit sa kalayo nabuhian niya ang bukton sa bata.

Gidali sa pagdala sa Davao del Sur Provincial Hospital ang biktima apan gideklarang patay na sa mga nag-atimang doktor.

Si Nora nga nagluwas sa iyang anak nahiagom sab og 3rd degree burn sa iyang bukton ug abaga apan nakaguwa na sa bay tambalanan.

Nasayran nga ang 9 ka bulan nga bata way bisan unsang tatsa sa lawas sa dihang naluwas sa inahan.

Labihan ang pagbangotan sa inahan human nga namatay ang iyang anak nga lalaki.

Sumala sa taho nga nakaabot sa Superbalita, kanunay nang maghaling sa silong sa balay ang inahan aron ang aso moabog sa mga lamok.

Wa magdahom ang inahan nga masunog ang ilang balay niadtong higayona nga gama sa kawayan ang salog ug kalakat ang bung-bong nga giatupan og sinibit nga lubi mao nga paspas kaayong nikanit ang kalayo.

Apan hugot nga milimod si Nora nga naghaling siya sa silong sa ilang payag.

Ang buhatan sa Bureau of Fire Protection (BFP) di pa makasulti sa hinungdan sa sunog kay padayon pa ang ilang pagsusi sa hitabo.

Gibana-bana sa BFP nga nibalor og P10 mil ang danyos sa sunog. Sanglit nawad-an og pinuy-anan, nanawagan ang inahan sa biktima ngadto sa mga tawong dunay malumong kasing-kasing nga matabangan ang ilang kahimtang aron makaangkon og disenteng lubong ang namatay nga anak.

Ang patay'ng lawas sa bata gihaya na sa usa ka purok human nga naabo ang ilang panimalay.