NEA wa nay labot sa Daneco

DAVAO DEL NORTE - Subling gipalig-on sa Cooperative Development Authority (CDA) ang pagpanag-iya sa mga miyembro-konsumante sa Davao del Norte Electric Cooperative (Daneco).

Kini human nga nagpadala ang CDA og sulat ngadto kang Daneco lawyer Atty. Glenn Blair Carnicer pinaagi kang Acting Executive Director Orlando Ravanera niadtong nakalabay'ng semana.

Pinetsahan Hulyo 13, 2012, miabot ang sulat ni Ravanera Hulyo 14 sa buhatan ni Carnicer nga maoy nakapaaghat sa pagbalik og trabaho sa mga kasamtangang Board of Director nga nipahulay una tungod sa hangyo ni Comval Governor Arthuro Uy niadtong Hulyo 9 isip pagtuman sa kasabutan tali ni Uy ug Department of Energy Secretary Jose Almendras didto sa kaulohan niadtong Hulyo 6 ning bulana.

Gipangayo ni Almendras ang re-confirmation sa certification of registration nga sumala pa tubag ni Ravanera ngadto kang Carnicer nga dili na kinahanglanon sanglit niadto pang Mayo 21 ning tuiga gitunol sa CDA.

Di na matud pa kini kinahanglan tungod kay sakto nang ikamatuod nga ang Daneco iya na gyud sa katawhan nga mipailawom sa CDA.

Gikatingala ni Ravanera kon nganong gitugotan pa ang presensiya sa project supervisor sa NEA nga si Evangelio Estaca nga nakamugna og kasamok sa Daneco.

Nasayran nga niadtong Sabado, ang buhatan sa Provincial Cooperative Union (PCU) ug nagkadaiyang kooperatiba sa duha ka probinsiya ilawom sa serbisyo sa Daneco nagkauyon sa paghangyo sa mga empleyado nga motrabaho lang ug dili moapil sa kaguliyang sa tagdumala.

Sanglit nakakuha og dugang kusog ang mga BOD sa mga miyembro-konsumante, naaghat silang mobalik na sa pagtrabaho ug nagkauyon nga dili na pasudlon si Estaca aron nga wa nay mahitabong kasamok.

Kagahapong adlawa, dul-an sa gatus ka mga tawo atbang sa opisina sa Daneco nagpahigayon og peaceful rally bitbit ang mga plakard batok sa NEA nga nagkanayon, "NEA ayaw na pagsamok-samok", "NEA tantanan mo na kami", "NEA out! CDA in", ug "CDA 49,000, NEA 1,700 KINSAY DAUG?"

Didto sa Montevista, Comval, nasayrang mokabat ngadto sa kapin 300 ka tawo ang nag-rally usab atubangan sa opisina sa Daneco sa maong lungsod.

Nasayran nga miapil sa maong rally mao si kanhi Comval 1st district congressman Manuel "Way Kurat" Zamora.

"Apil ko ana nga kaming Gov Uy, DILG Secretary, DOE Secretary Almendras nga tumanon mga kasabutan uban sa hangyo ni Almendras ngadto kang Uy nga maoy mopatiwala alang sa kahapsay sa Daneco. Apan gilingla nila ang governor kay wala nila tumana ang kasabutan, busa ako mag-aghat sa mga miyembro-konsumante nga apil sa rally ug isinggit ang pagpapahawa sa hingpit sa NEA," hagit ni Zamora.

Kagahapon, gisuwayan pagkuha ang pahayag ni Estaca bahin sa hitabo apan pakyas kay di na siya makontak sa iyang telepono.

Pakyas sab nga ma-istorya aron nga makuhaan og pahayag ang taga DOE pinaagi ni Undersecretary Ina Asirit. (Teddy Cabana)