7 anyos patay sa granada

COTABATO CITY - Usa ka siete anyos nga babaye ang namatay samtang kritikal ang inahan human nga gilabay og granada ang panimalay ni kanhi Governor Datu Andal Ampatuan Sr. alas 3:20 sa hapon niadtong Lunes didto sa Maguindanao Province.

Ang namatay giila nga si Agatha Sakal, samtang ang inahan mao si Samsia, pulos molupyo sa Barangay Timbangan, Sharief Aguak.

Nasayran gikan kang Colonel Mayoralgo Dela Cruz, 1st Mechanized Infantry Light Armor Brigade commander, nga giitsahan og granada sa wala mailhing mga suspetsado ang balay ni Ampatuan Sr. apan didto kini mitugpa sa atbang nga bahin sa balay ug mibusikad.

Natayming nga ang mag-inahan nagtindog sa maong dapit hinungdan nga nabuthan sila.

Gidali sila sa pagtabang ug gidala sa Maguindanao Provincial Hospital apan gideklara nga dead on arrival sa mga doktor ang bata samtang kritikal ang inahan.

Mga biktima nakahiagum og daghang mga samad sa lawas gikan sa mituasik nga tipaka sa granada.

Suma ni Dela Cruz nga ang gibuthan sa granada duol sa lugar nga gipahigayonan sa rehistro sa mga molupyo sa Barangay Koloy, Sharief Aguak.

Dako sab ang pagtuo ni Governor Esmael "Toto" Mangudadatu nga ang pagpanglabay og granada posibling panabotahe sa ubang pundok sa kasamtangang gipahigayon nga general registration of voters sa Autonomous Region in Muslim Mindanao.

Kapulisan mihimo na og lakang aron sayron kung kinsa ang mga nanglabay og granada.