Reklamo sa Ipa-Super Mo giatiman sa building official

ANG Office of the Building Official (OBO) niadtong Martes nagsulti nga ilang irekomenda sa konseho ang usa ka ordinansa nga magbantay sa higanteng billboards lakip na ang electronic LED billboards sa siyudad sa Davao.

Si OBO chief Jaime Adalin nagbutyag dihang gihinabi sa Sun.Star Davao ug SuperBalita nga ila kining himuon tungod kay ang Presidential Decree No. 1096 kun nailang National Building Code wa naglatid og espisikong impormasyon bahin sa electronic billboards.

Mao kini ang ilang aksiyon human usa ka drayber dyip ang nagreklamo Ipa-Super Mo Section sa Sun.Star SuperBalita niadtong Hulyo 5, 2012.

Ang nagpakabanang drayber nagpdala og hulagway nga nagpakita sa electronic LED TV advertisement nga giinstalar sa Sychar Hotel sa Jose P. Laurel Avenue, ning siyudad.

Ang nagpakabanang reader, kinsa nagdumili nga ibutyag ang pangalan, nagsulti nga ang kahayag sa LED TV nakahasol kaniya samtang nagmaneho sa maong kalsada.

Si Adalin nagsulti nga makigsabot siya ni Ret. Col. Desiderio Cloribel, hepe sa Traffic Management Center (TMC) bahin sa maong butang.

Base sa ilang report, ang LED TV advertisement dunay permit alang sa ilang operasyon, apan ang ilang occupational permit wa ma mahatag sa maong buhatan.

Si Adalin daling midugang nga ang tanang sektor, lakip na ang negusyante nga apektado kinahanglan unang konsultahon.

Samtang ang PD 1096 wa gilatid ang insaktong distansiya sa billboard o LED TV ad gikan sa yuta, ang ordinansa nagtinguha nga maglatid sa tugutan nga distansiya ug gidak-on sa tanang advertisement billboards.

Ang maong opisyal misaad nga ilang susihon ang epekto sa maong LED TV ad sa maong dapit aron makahimo sila og aksiyon sa maong reklamo. (Jereco O. Paloma)