Leader sa pedicab drivers gipikhan

TAGUM CITY - Blangko pa ang Tagum City Police Station (TCPS) kon unsay motibo kon nganong gipusil patay ang usa ka organizer sa mga gikaintapang sakop sa Riding in Tandem Killer (RTK).

Patay gilayon ang biktima nga si Perfecto Cadullo Jr., 58, minyo, self-employed, taga Zafra, Purok Talisay, Barangay Apokon, Tagum City.

Sumala pa nga gipusil si Cadullo makaduha ka higayon sa ulo alas 6:30 sa gabii niadtong Biyernes didto sa atbang sa NCCC Mall, National Highway, Barangay East.

Mga sakop sa Scene of the Crime Operatives (Soco) sa pagpangulo ni PO3 Romeo Obero, nakarekober og duha ka basiyo ug balines sa bala sa kalibre .45 nga pistola nga gituohang maoy gigamit sa mga mamumuno nga nakasakay og motorsiklo.

Sa imbestigasyon ni SPO1 Gene Be¤ares sa TCPS, nasayrang si Cadullo paingon unta sa City Proper sakay sa iyang itom nga Suzuki Raider.

Apan gi-obertikan siya sa walang bahin sa laing motorsiklo nga dunay sakay nga tulo ka mga lalaki kon diin duha niini maoy nagpusil sa biktima.

Sa dihang naigo ang biktima, motor niini nabalentong sa dalan. Sumala pa nga si Cadullo usa sa mga iladong organizer sa urban poor housing ug ilado usab nga lider sa mga asosasyon sa mga pedicab drivers sa siyudad.

Patay'ng lawas ni Cadullo naa gihaya sa Topaz Funeral Homes sa siyudad sa Tagum. (Teddy Cabana)