Pag-umangkon sa VM gipatay

COTABATO CITY - Patay ang pag-umangkon sa bise mayor human nga gipusil ala 1:05 sa kaadlawon kagahapon.

Giila ang biktima nga si Saidally Sumagka, 20, pag-umangkon ni Talitay Maguindanao Vice Mayor Datu Cabili Sumagka ug molupyo sa Nayon Shariff Kabunsuan, Barangay Poblacion 2.

Gibutyag ni Cotabato City Police Office deputy director Supt. Marlou Martinez nga naglakaw lang si Sumagka uban ang tulo niya ka mga barkada didto sa Governor Gutierrez Boulevard sa dihang nahitabo ang pagpamusil.

Nasayran nga ang biktima uban sa mga higala pauli na sa ilang balay gikan mitan-aw sa pasundayag sa City Plaza.

Apan pag-abot nila atbang sa 2000 Videoke House duna silay nakalalis nga duha ka wala mailhing tawo sa wala masayri nga hinungdan.

Usa sa mga suspetsado ang mihulbot sa dala nga kalibre .45 nga pistola ug gipusil ang biktima tumong sa iyang ulo ug dughan.

Dali sab nga misibat ang mga mamumuno sa diha nga ilang nakit-an nga naligo na ang biktima sa iyang kaugalingong dugo.

Gitabang si Sumagka sa iyang mga barkada ug gidala sa Cotabato Regional and Medical Center (CRMC).

Apan gideklara siya sa mga attending physician nga dead on arrival. Sa kasamtangan, duna nay upat ka mga tawo ang gipailawom karon sa pagsukit-sukit sa kapulisan nga posibling dunay kalabutan sa pagpatay sa biktima. (Edgardo Fuerzas)