Gatusan ka pamilya namakwet sa giyera
-A A +ASunday, July 22, 2012
DATU MONTAWAL, Maguindanao Province - Nanghikling ang gatusan ka pamilya sa dihang mga armadong grupo nagka-engkuwentro alas 2 sa hapon niadtong Sabado.
Gibutyag ni 6th Infantry Division Public Affairs chief Colonel Prudencio Asto nga nagkaabot ang mga armadong sakop nila Kumander Bhuto sa Moro Islamic Liberation Front (MILF) ug pundok sa pamilyang Pinggayman sa Barangay Talapas, Datu Montawal, hinungdan sa bakbakan.
Gumikan sa dagkong mga buto-buto sa mga tag-as nga armas, nagkatibulaag ang mga sibilyan ug nanagan paingon sa mga luwas nga lugar.
Kadaghanan sa mga namakwet temporary nga naghimo'g payag-payag kilid sa Maguindanao-Cotabato Highway.
Suma sa mga sibilyan nga dunay nakit-an sila nga duha ka tawo nga napatay sa maong panag-engkuwentro apan dili matino kon pila ang naangol.
Bisan ang GRP/MILF Ceasefire Committee uban ang International Monitoring Team (IMT) ang naglisud sa pagsulod sa mga apektadong dapit gumikan kay padayon pa ang katag-katag nga pinusilay sa magka-away nga grupo.
Hinuon, dali sab dayon nga milihok si Maguindanao Governor Esmael Mangudadatu aron matabangan ang mga bakwet ug maresolba ang kagubot. (Edgardo Fuerzas)
Gipatik sa mantalaang SuperBalita Davao Hulyo 23, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
