Dispatser gipusil, patay

USA ka dispatser ang gipusil patay sa wa mailhing mamumuno alas 4:00 sa hapon kagahapon didto sa Lizada Street, Barangay 26-C Poblacion, siyudad sa Davao.

Base sa impormasyon nga nahipus gikan sa barangay, ang biktima mao si Edgar Tugonon, hamtong ang pangidaron, dunay kapuyo ug nagpuyo sa Purok 4, Balon, Barangay 26-C Poblacion.

Nasayran nga ang biktima nanawag og pasahero sa mga taxi nga nagpaabot og pasahero sa lugar, apan kalit nga giduol sa armadong tawo.

Wa maglangan ang mamumuno, gipusil dayon ang biktima tumong sa iyang ulo nga miresulta sa iyang kamatayon.

Ang asawa sa biktima nagbutyag nga way kontra ang iyang bana sa ilang barangay.

Wa say rekord ang biktima sa kapulisan tungod sa pagkalambigit sa krimen.

Samtang gisuwat kining balita, padayon pang gisubay sa kapulisan ang motibo sa pagpamusil. (AD)