179 nangahilo sa paniudto

MIKABAT sa 179 ka mga tawo ang nangalanag sa ilang gikaon nga packed meal atol sa gihimong Conference of Ateneo Student Leaders didto sa Ateneo de Davao University (AdDU) Campus sa dalang Roxas, siyudad sa Davao niadtong Dominggo.

Si Ricky Enriquez, director sa Student Affairs sa AdDU, nagbutyag sa SuperBalita nga 51 sa mga biktima ang na-admit sa San Pedro Hospital, samtang 16 ang mitugpa sa Davao Doctors Hospital ug usa sa Davao Medical School Foundation.

Dugang ni Enriquez nga ang uban sa kinatibuk-ang ihap sa mga nangalanag nakagawas dayon sa tambalanan.

Lakip sa gidala sa balay tambalanan mao ang Presidente sa maong eskwelahan nga si Fr. Joel Tabora kinsa nakagawas na karon sa ospital.

Nasayran nga dugay na nga caterer sa eskwelahan nga si Neneng Rebosura ug karon lang kini nagkaproblema sa giandam nga pagkaon.

Nasayran nga gisalmotan ang maong Leadership Training Seminar sa 300 ka mga estudyante.

"Isa ako sa na food poison. Around 3 p.m. nagsimula akong nakaramdam ng pananakit ng sikmura. Akala ko nga ako lang nakaramdam, pero nung pumunta ako sa men's CR puno na ng suka yung dalawang sink tapos may di pa umabot sa toilet bowl," suma ni Ricky Zonio, usa sa mga estudyante, sa iyang Twitter account.

Tungod sa nahitabo, suspendido ang catering services sa tanan nila nga mga transaksiyon sa eskwelahan samtang gihimo ang imbestigasyon.

Gidala na usab sa kaulohang Manila ang sample sa mga pagkaon aron masayran kung unsang klase sa kagaw ang mitakboy niini.

Andam usab nga sagubangon sa Ateneo de Davao University ang tanang galastuhan ospital lakip na ang mga tambal sa mga nangalanag.

Sa laing bahin, si Mayor Sara Duterte-Carpio mibutyag nga base sa impormasyon nga iyang nadawat, 300 ka mga estudyante ang nakakaon sa pagkaon nga gidalit sa caterer.

"According to our EMTs, in-house caterer daw ng Ateneo. Refused to divulge yung OSA (Office of Students Affairs) ng AdDU," suma sa mayor sa iyang mensahe sa text niadtong Dominggo sa gabii.

Dugang ni Mayor Duterte-Carpio nga nag-imbestiga na ang City Health Office sa mga pasilidad sa caterer kagahapon.

Daling mibisita usab si Vice Mayor Rodrigo Duterte sa mga biktima didto sa tambalanan.