6 bay gilamoy sa kayo

UNOM ka mga balay ang gilamoy sa kalayo sa managlahing lugar dinhi sa siyudad sa Davao niadtong Lunes.

Samtang usa ka poste sab sa Davao Light and Power Company (DLPC) didto sa Buhangin ning siyudad sa Davao ang nasunog sa samang adlaw.

Unang sunog nahitabo didto sa Venus Street, Crossing Bayabas, Toril kon diin lima ka mga balay ang nasunog alas 5:10 sa hapon.

Nasayran nga nagsugod ang kalayo sa balay ni Alexander Camera Donesa, hamtong ang pangedaron nga mikatag ngadto sa mga balay nila Estrilla Olenares Cayapos, Noime Ausan Logronio, Carmen Gatsalyan Mabano ug Cherry Mae Donesa Epa.

Gibanabana nga miabot ngadto sa dul-an P700,000 ang danyos sa sunog nga ang gitudlong hinungdan mao ang faulty electrical wirings.

Gideklarang pawong na ang kayo sa Bureau of Fire Protection alas 5:30 sa hapon.

Samtang alas 6:00 sa gabii sa maong adlaw, gilamoy sab sa kalayo ang balay ni Ceriaca Cambarihan Melecio, 62, didto sa Purok 7-B, Inabangga, Bunawan ning dakbayan tungod sa electrical short circuit.

Gibanabana nga miabot ngadto sa P100,000 ang danyos sa sunog nga gideklarang pawong na human ang 25 minutos nga pagkombati sa mga kabomberohan.

Sa pikas bahin, mibuto ug midilaob sab ang usa ka poste sa DLPC didto sa Buhangin Proper sa dakbayan alas 5:00 sa hapon.

Nasayran nga ang insidente gitaho sa usa ka Joel Curiba Saldana sa dihang iyang nakita nga mibuto ug misiga ang sodium nga suga sa maong poste dayon misilaob.

Usa ka oras pa ang milabay sa dihang napalong sa Buhangin Firefighters ang pagkalayo sa poste. (Blue Cordero)