Estasyon sa radyo gisirad-an sa mayor

TAGUM CITY - Gipasirado ni Tagum City Mayor Rey Uy ang usa ka estasyon sa radyo tungod sa matud pa walay permiso niadtong milabay nga semana.

Giklaro ni Uy nga ang Radyo Caritas, 100.7 Perfect FM sa Bano Building, Rizal Street napakyas nga makahatag og mga rekisitos nga magpamatuod nga legal ang operasyon.

"Gisirad-an ang Radyo Caritas kay walay franchise kay ang usa ka radio station dapat may kaugalingong prangkisa pareha sa usa ka pedicab, dapat may kaugalingon nga prangkisa pareha ra pud ni sa bus nga individual gyud ang franchise," tin-aw ni Uy.

Mga personahe mismo sa City Licensing Section sa Tagum City ang misirado sa estasyon niadtong milabay'ng semana human sa taas usab nga panahon nga paghatag og pahibawo nga ipasa ang ilang provisional authority (PA) isip usa sa rekisitos nga mahatagan og lisensiya gikan sa lokal nga kagamhanan.

Gawas niini, daghan usab ang mireklamo sa maong estasyon tungod sa matud pa walay basihan ang ilang mga personal nga pagpangataki sa daghang personalidad nga dakong paglapas sa "broadcast code of ethics".

Giangkon ni Uy nga siya mismo nakatilaw sa mga ataki sa maong estasyon.

Apan iyang gitin-aw nga di kini maoy hinungdan kon nganong iyang gipasirad-an ang estasyon.

Gipaneguro sa mayor nga bisan unsang orasa puwede nga mobalik sa operasyon ang radyo kon makakuha na kini og permiso sa pagpanibya. (Teddy Cabana)