4 bata nga gi-dengue namatay

STA. CRUZ, Davao del Sur - Upat na ka mga bata ang natala nga namatay sa sakit nga dengue sa lungsod, sumala sa gipaguwang taho sa Municipal Health Office (MHO).

Gikanayon ni Aidelita Aguilar, Sanitary Inspector II sa MHO nga padayon pa gihapon ang pagtaas sa ihap sa mga kabataan nga natakbuyan sa sakit.

Ang datos natala gikan niadtong bulan sa Enero hangtud Hunyo karong tuiga diin mokabat na sa 126 ang mga pasyente nga nagka-dengue.

Sa milabay'ng bulan sa Hulyo, wala pa nahuman og han-ay sa MHO ang ilang datos kung pila na ka pasyente ang natakbuyan sa dengue apan gipabuhagay ni Aguilar nga aduna na'y 4 ka mga tawo ang namatay gikan sa bulan sa Enero hangtud sa Hulyo.

Si Aguilar, dugang namahayag nga nagpahigayon na sila sa pag-spray sa mga kabalayan nga direktang naapektuhan sa dengue.

Niadtong Miyerkules, gisugdan sa pag-spray ang Sityo Bitaug, Barangay Zone IV sa mang lungsod.

Si Kapitan Anecito Miro sa Barangay Zone IV, dihang gihinabi sa Superbalita, nitataw nga mokabat sa 530 ka mga balay ang ilang target nga ma-spray-han.

Himuon sa barangay ang maong buluhaton sud sa usa ka semana aron masegurong mapatay ang mga lamok nga "aedis egypti" nga nagdala sa kagaw sa dengue.

Adunay 45 ka mga pasyente ang nagka-dengue sa ilang lugar apan wa hinuoy gikataho nga namatay.

Ang igsuon sa kapitan nga si Wilfredo Miro nag-boluntaryo kauban ang lain pang tulo ka mga tawo sa pagpas-an sa knapsack aron mapadali ang pag-spray sa mga kabalayan. (Orlando B. Dinoy)