15 truck kahoy gikan Davao himuong bangko

TAGUM CITY - Mokabat sa 15 ka mga dagkong trak ang madugang sa ihap sa nag-anam og kadaghan nga mga trak sulod sa Tagum City Motor pool nga puno sa daghang mga kahoy.

Kini ang gitaho ni Tagum City Mayor Rey Uy sa pakighinabi sa Superbalita kalabot sa giingong pagtunol ni Davao City Vice Mayor Rodrigo Duterte sa dili madugay sa mga kinompiskang mga container van nga puno og mga ginabas nga mga ilegal nga kahoy.

Tug-an ni Uy nga silang duha ni Duterte nag-istorya bahin niini dihang midonar siya og kapin 200 nga mga bangko didto sa Navarro Elementary School, Barangay Lasang, Davao City niadtong malabay nga bulan.

Tungod sa kalipay sa bise mayor sa pagtunol ni Uy og mga bangko, nakadesider siya nga ihatag na lang ang mga kahoy nga gikarga sa kinse ka mga container van sa Tagum sanglit nakita niya ang modernong kagamitan ug luwas nga dapit nga masegurong dili makawat ang mga kahoy.

Gikatahong gibana-banang mokabat ngadto sa kapin P3 milyones ang kantidad sa maong kahoy nga ihatag sa Davao ngadto sa Tagum aron nga himuong mga bangko alang sa mga nagkinahanglang tulunghaan sa publiko dili lang sa rehiyon lakip na sa uban pang mga lugar.

Mokabat na ngadto sa P59 mil ka mga bangko ang nabuhat sa siyudad sa Tagum ubos sa Chairs for School program ni Mayor Uy.

Gitug-an ni Uy nga bisan singko sentabos, way gitunol ang national nga panggamhanan sa maong programa ug gisaligan lamang ni Uy ang grabeng suporta sa katawhan nga midonar og pinansiyal, pintora ug kagamitan sa pagpanday. (Teddy Cabana)