Lalaki nakaplagang patay sa sapa

USA ka patay nga lawas sa lalaki ang nakaplagan nga naglutaw sa sapa alas 9:15 sa buntag niadtong Sabado didto sa Purok 9-B, Lower Madapo, Barangay 5-A Bankerohan, siyudad sa Davao.

Gihulagway ang patay nga lawas nga nagsuot og kolor blue nga t-shirt, kolor brown nga pang-ilawom nga sapot ug anaa sa 25 hangtud 30 anyos ang pangedaron, kasarangan ang panglawas ug itom ang pamanit.

Nakit-an sa mga residente sa maong lugar nga naglutaw ang maong patay nga lawas hinungdan nga ila kining gibira paingon sa daplin sa sapa.

Mihangyo karon ang kapulisan kung kinsa man nga nawad-an og mga miyembro sa pamilya nga moadto lamang sa Angel Funeral Homes sa dalang Torres, ning dakbayan para matan-aw ang maong patay nga lawas. (Blue Cordero)