4 nanumod og druga nasapon

NASIKOP sa kapulisan ang upat ka mga lalaki nga namaligya og gidiling druga sa managlahing lugar dinhi sa siyudad sa Davao.

Pinakabag-ong nadakpan sa kapulisan mao si Christian “Bon-bon” Matukol, hingkod ang edad, taga Deca Homes, Cabantian ning dakbayan.

Nasikop si Matukol pinaagi sa gihimong buy-bust operations sa kapulisan sa Sta. Ana Police Station alas 11:50 sa buntag kagahapon didto sa Padre Faura Street, Barangay 32-D, subay sa sumbong sa impormante sa pulis.

Nakuha gikan kang Matukol ang usa ka pakite sa shabu nga nagkantidad og P2,000 lakip na ang usa ka pakite nga marijuana.

Nadakpan usab sila Hasanji Alamansa Ambo, 51, minyo, pintor, taga Purok 1-B, Barangay 76-A ug Franky Guinoo Inson, 35, minyo, salesman ug taga Block 9, Spring Valley, Buhangin ning dakbayan bandang alas 3:35 sa hapon niadtong Dominggo pinaagi sa buy-bust operation didto sa balay ni Ambo.

Nakuha gikan sa duha ang upat ka mga pakite nga dunay sulod nga shabu lakip na ang marked money nga P1,000, 40 ka mga walay sulod nga mga pakite og duha ka mga disposable nga lighter.

Samtang laing buy-bust operation nga gilusad sa gisakpan sa Investigation and Detection Management Branch (IDMB) sa Davao City Police Office (DCPO), nasakuti sab si Lito Barredo Cabaneles, 38, minyo, lumad nga taga purok 1, Poblacion New Bataan, Comval Province.

Nadakpan ang suspek sa waiting shed didto sa Kilometer 28, Lasang.

Nakuha gikan kang Cabaneles mao ang usa ka dako nga bandol sa marijuana nga nagkantidad og P1,000 lakip na ang marked money nga P1,000 og laing 1 1/2 kilos sa marijuana nga nagkantidad og P12,500.

Gisakaan na og kaso kagahapon ang mga dinakpan sa paglapas Republic Act 9165 kun Comprehensive Dangerous Drugs Act of 2002. (Blue Cordero)