Wa mibayad sa premyo gipriso

USA ka organizer sa dakong pasundayag ang gipaslak sa prisohan human napakyas pagbayad sa premyo sa midaug sa Battle of the Bests nga gihimo sa Davao Recreation Center niadtong Sabado.

Gipriso sa San Pedro Police Station mao si Rojin Enoc, 31, sa Vision Quest nga nakabase dinhi sa siyudad sa Davao.

Si Enoc gireklamo sa Urban Mix nga gikan pa sa Cagayan de Oro City.

Ang Urban Mix, dunay 20 ka mga miyembro nga dancers, nagreklamo tungod kay kuwang ang gihatag kanila nga premyo nga nagkantidad og P100 mil.

Mga nagreklamo nagbutyag nga nasayran nila nga sa maong kompetisyon pinaagi sa Internet gipabayad sila sa kantidad nga P6 mil isip registration fee sa aktibidad nga kabahin sa Kadayawan sa Dabaw Festival.

Subay sa ilang gikasabotan, ang premyo sa kampeyon nagkantidad og P100 mil, P50 mil sa ikaduha ug P30 mil sa ikatulong mananaug.

Nakuha sa Urban Mix ang kampeyonato mao nga ila dayong gisingil ang organizer, apan giingnan silang ihulog lang sa ATM ang maong premyo pagkasunod adlaw.

Namugos ang grupo nga ihatag dayon ang premyo tungod kay nagpakyaw sila og sakyanan gikan sa Cagayan de Oro City nga nagkantidad og P12 mil.

Nagkasabot silang kuhaon ang premyo sa SM City Davao, apan P60 mil lamang ang gihatag sa organizer mao nga ilang gireklamo sa pulis.

Gipangatarungan sa organizer nga nakuwang ang salapi tungod kay wa pa mibayad ang uban nilang sponsors mao nga iyang gihangyo ang grupo nga sabton ang ilang kahimtang.

Sa pagsuwat ning balita, wa pay pormal nga reklamo nga gipasaka batok sa suspek.