CBO: Certificate of Occupancy sa led billboard among gipugngan

ANG City Building Office nangayo karon og Affidavit of Undertaking sa tag-iya sa usa ka led billboard nga nahimutang sa Sychar Hotel sa JP Laurel Avenue, siyudad sa Davao.

Mao kini ang lakang sa buhatan human gireklamo sa nagpakabanang drayber sa Ipa-Super Mo Section sa Sun.Star Superbalita ang maong led billboard niadtong miaging semana.

Ang drayber nagreklamo tungod kay sulaw kaayo ang suga gikan sa led billboard og nakadisturbo sa mga drayber nga moagi sa maong lugar.

Sumala ni Engineer Jaime Adalin sa City Buliding Office nga kung ugaling makita nila nga makadisturbo sa mga drayber sa mga pribado og publikong sakyanan ang siga sa suga nga gikan sa billboard, ila kining pahinayan.

"They will reduce the light emission as well as the direction of the led television. Although, nakita namin na medyo malayo siya dun sa traffic lights, just to be sure about it, yung affidavit of undertaking ang i-submit sa amin saka namin i-consider ang issuance of Certificate of Occupancy," suma ni Adalin sa Superbalita kagahapong adlawa.

Giklaro ni Adalin nga na-isyuhan na og Building Permit ang tag-iya sa maong billboard, apan wa pa mahatag ang Certificate of Occupancy.

Gipasabot sa opisyal nga kung di masumite ang affidavit, di nila mahatag ang certificate of occupancy sa tagdumala sa billboard.

Sa maong dokumento, ilatid sa tagdumala ang kondisyunes nga angay nilang tumanon aron di madisturbo ang ubang sektor. (Blue Cordero)