Ex-Police sikop sa druga

USA ka kanhi pulis ang nasikop kapulisan dihang gipatuman ang search warrant alas 12 sa tungang gabii kagahapon didto sa Purok 6, Barangay 39-D Poblacion, siyudad sa Davao.

Nasikop mao si kanhi Police Officer 2 (PO2) Rodel Recina Asupan, hamtong ang pangedaron og kanhing sakop sa Sta. Police Station.

Si Asupan nataktak sa katungdanan human napamatud-an nga naggamitan siya og druga sa gihimong random drug testing sa miaging tuig.

Nakuha gikan kaniya ang usa ka paketeng shabu nga gibutang sa kaha sa sigarilyo.

Si Asupan nasikop human gitudlo sa tawo nga maoy tumong sa search warrant nga si Federico Boiser, alyas Esboy.

Nakuha sab gikan kang Boiser ang usa ka jumbo nga paketeng shabu, usa ka medium size nga pakete sa shabu, 14 ka mga small sachet sa shabu, og uban pang drug paraphernalia.

Nasayran nga usa ka bulan nang gipanid-an sa mga sakop sa Intelligence Section sa San Pedro Police Station ang suspek nga si Boiser.

Mga suspek malampusong nasikop nila Senior Police Officer 1 (SPO1) Raul Lucas, SPO1 Ejercito Molina, SPO1 Vivencio Humawan, PO2 Richard Baldos ug PO2 Filipe Tiu kinsa maoy mipatuman sa search warrant nga gipaguwa ni Judge Pelagio Paguican sa Regional Trial Court Branch 11.

Kagahapon sa buntag, gipasaka na ang kasong paglapas sa Republic Act 9165 kun Comprehensive Dangerous Drugs Act of 2002 didto sa City Prosecution Office.