Nagmotor gipusil sa RTK, patay
-A A +ATuesday, August 7, 2012
TAGUM CITY - Patay ang usa ka lalaki kinsa nagmotor human nga gipusil alas 2:30 sa hapon niadtong Lunes atbang sa Apokon Elementary School, Barangay Apokon ning siyudad.
Ang biktima naila nga si Henry Heruela, 29, minyo, molupyo sa Purok 3-C, Apokon Relocation Area, Apokon, Tagum City.
Si Heruela gitahong nagmaneho sa iyang bag-ong motorsiklo nga kolor blue og puti nga XRM 125 nga gikan sa Poblacion sa siyudad.
Apan pag-abot niya sa Apokon Road atbang gayud sa nahisgutang tulunghaan, kalit nga gi-obertikan sa laing motorsiklo nga gisakyan sa duha ka mga mamumuno.
Ang angkas sa motorsiklo maoy miluthang sa biktima makadaghang higayon gamit ang kalibre .45 nga pistola.
Kini base sab sa nahipus nga mga basiyo sa bala sa maong kalibre sa mga sakop Scene of the Crime Operatives (Soco).
Human mahiling sa Soco, patay nga lawas sa biktima gidala gilayon sa Topaz Memorial Chapel human nga gideklarang dead on the spot ni Dr. Arnel Florendo sa Tagum City Health Office.
Di pa matino kon unsa ang hinungadn sa pagpusil patay sa biktima. (Teddy Cabana)
Gipatik sa mantalaang SuperBalita Davao Agosto 08, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
