Pag-aresto sa mayor dunay bulok politika?
-A A +ATuesday, August 7, 2012
JOSE ABAD SANTOS, Davao del Sur - Dako ang pagtuo sa kampo ni Mayor James Joyce nga dunay nagpaluyong politiko sa pagronda sa kapulisan sa iyang pinuy-anan niadtong Biyernes sa kaadlawon.
Sa pakighinabi sa Superbalita kagahapong adlawa, gibutyag sa anak sa mayor nga si Attorney Jason John Joyce, kinsa municipal administrator sab sa JAS, nga posibleng adunay kolor politika ang pagdakop sa iyang amahan ilabi na nga nagkaduol ang piliay sa 2013.
Nasayran gikan kang Jason John nga niadtong 2010 nga piliay, nakig-alyansa sila sa kampo ni Governor Douglas Cagas apan wala madugay naguba ang ilang maayong relasyon.
Kasamtangan, kaalyado na sila sa mga Bautista ilabi na kon modagan sa pagka-gobernador si kanhi Representative Claude Bautista (2nd District).
Gibarogan sa mga Joyce nga adunay lisensiya ang ilang mga armas apan ila na lamang kining awayon ngadto sa korte.
"As of Friday, complaint against the six accused was dismissed. The firearms have licensed and papers were presented during the raid but the raiding team insisted on confiscating the firearms. Thanks for getting our side of the story. This is plain political harassment," tin-aw ni Jason John.
Sa dihang gikuhaan og pamahayag, gikanayon ni Cagas nga hayan si Mayor Joyce lamang ang namolitika ilabi pa nga adunay direktibang gipaguwa si Presidente Benigno Aquino III.
"I don't know but PAGS means Partisan Armed Groups and since Mayor Joyce is a politician, he must be politicking," ni Cagas pa.
"In the first place, it was and is President Aquino, who directed the PNP to dismantle all PAGS," dugang sa gobernador.
Sumala pa nga daghan pang gukdon nga Private Armed Groups ang kapulisan
sa Davao del Sur karong pipila ka mga adlaw.
Kahinumdoman nga gidakop si Mayor Joyce, kuyog ang iyang unom ka mga guwardiya nga pulos mga sakop sa Civil Security Unit sa ilang lugar.
Ang mayor gilayong nakagawas sa kostudiya sa mga otoridad human nakabayad og piyansa nga P200 mil sa korte.
Hinuon, gitaktak ang kaso batok sa unom ka mga guwardiya tungod matud pa sa kakuwang sa ebidensiya.
Ang mayor gipasakaan og kasong illegal possession of firearms. (Orlando B. Dinoy)
Gipatik sa mantalaang SuperBalita Davao Agosto 08, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
