7 balay sa Davao Sur gikuso-kuso sa buhawi

MAGSAYSAY, Davao del Sur - Unom ka mga balay ang naguba human gikuso-kuso sa kusog nga buhawi alas 3 sa hapon niadtong Lunes.

Nasayran nga mga Purok 1, 2 ug 4 sa Barangay Bacungan sa maong lungsod maoy gihapak sa buhawi.

Si Carlos Alindahaw Gikanayon, 71 anyos, usa sa mga apektado, nagkanayon sa SuperBalita Davao nga labihan ang iyang kakulba human nga kalit lang nihapak ang kusog nga hangin nga sumala niya buhawi.

Dugang niyang gisaysay nga dali siyang misulod sa balay, apan labihan na lang niyang kahikurat sa dihang milupad ang atop sa iyang balay.

Ang balay usab ni Jocelyn Domingo nawad-an og atop human maigo sa kusog nga hangin.

Guba sab ang panimalay nila ni Jubert Gorabel, 36, Joy Sanchez, Angelita Paterno ug Omping Embodo, ug Ponciano Sarmiento.

Si Allan Alindahaw, kanhi kagawad sa maong barangay, nagsulti nga nakasaksi usab siya sa hitabo.

Matud niya nga mao kini ang pinakaunang hitabo sa ilang barangay nga giigo og buhawi.

"Nabalaka ko kay ang akong mga anak tua ra ba sa school atong higayona," pulong ni Alindahaw.

Ang waiting shed nga duol sa pangpublikong tunghaan naguba sab niadtong tungura.

Alang sa ubang molupyo, di nila masabtan ang kakusog sa hangin human mi-undang ang kusog nga ulan.

Sa laing bahin daghan sab nga mga punoan sa kahoy sa usa ka ektaryang maisan ni Rene Boy Villanueva nahurot og kalarot.

Lima ka punoan sa mangga ni Nonito Rodriguez ang nangalarot ug nangaputol samtang ang sagingan ni Elpina Carnonazo nangatumba.

Gibisita na ni Mayor Jess Lumanog ang lugar aron personal nga sutaon ang nahitabo.

Gikanayon ni Lolemer Egos, action officer sa Municipal Disaster Risk Reduction Management Council, nga padayon ang ilang gihimong pagsusi kon pila ang danyos sa paghapak sa ipu-ipo aron nga makahatag og ayuda sa mga apektado.

Hinuon, dako gihapon ang pasalamat sa mga molupyo nga walay nasamdan sa milupad nga mga atop sa mga balay.

Si Kagawad Emmanuel Vasquez nitataw nga ilang tun-an kon unsay angay matabang sa barangay ngadto sa mga biktima. (SuperBalita Davao)