Mga bayot gipasidan-an magbaton og disiplina

TAGUM CITY - Gihagit karon sa taas nga opisyal sa Tagum City Health Office (CHO) ang tanang mga bayot nga paningkamotan ang disiplina sa kaugalingon ug likayan ang pakighilawas.

Mismong si Dr. Arnel Florendo, City Health Officer sa siyudad sa Tagum, naghagit ngadto sa mga bayot nga mas naila sa grupong binuhat magbaton og disiplina sa ilang kaugalingon.

Gitug-an ni Florendo nga sa siyudad sa Tagum duna nay siyam ka mga tawo ang nagbaton og sakit nga Acquired Immune Deficiency Syndrome (AIDS) ug 90 porsiyento niini mga lalaki nga nalambigit sa pakighilawas sa kaparehas nga lalaki.

"90 percent aning nag-positive sa AIDS kadtong mga men having sex with men," sulti ni Florendo.

Dugang ni Florendo nga nagtuo siya nga mas daghan pa ang nagbaton sa maong balatian nga wala lang matala sanglit ang siyudad duol lamang sa siyudad sa Davao.

Naningkamot karon ang buhatan sa CHO nga malikayan ang pagtaas sa maong insidente pinaagi sa hugtanong pagmonitor sa tanang mga videokihan ug mga imnanan.

Giobliga sab ni Florendo ang tanang Guest Relations Officer nga mokuha og health card ug ang senimanang smear test didto sa buhatan sa CHO.

Sumala ni Florendo nga ilang namonitor ang siyam ka mga tawo nga nagbaton sa maong sakit sanglit molupyo sila sa siyudad. Hinuon, ang ilang mga pagkatawo ang gitago aron nga malikay sa mga pagbiay-biay sa katilingban. (Teddy Cabana)