Sundalo mibisita sa uyab gipusil

MITUGPA sa balay tambalanan ang usa ka sundalo human gipusil sa giingong mga sakop sa rebeldeng New People's Army (NPA) samtang namisita sa iyang uyab.

Nakit-an si Private First Class John Oliver Ayuman, 24, ulitawo ug sakop sa Philippine Army Special Forces nga nadestino sa North Cotabato alas 6:30 na sa buntag niadtong Miyerkules didto sa Sitio Quibaton, Barangay Dominga, Calinan, siyudad sa Davao.

Sa blotter sa Calinan Police Station, nasayran nga mibisita si Ayuman bandang alas 7:30 sa gabii niadtong Martes sa boarding house sa iyang uyab nga si Juliecris Dequina Cadiz, 25, dalaga, usa ka maestra didto sa Sitio Quibaton.

Apan kalit lang mibutho ang tulo ka mga wala mailhing lalaki nga armado og mga pistola.

Sumala pa nga gipugos ang biktima nga paubanon sa tulo kay gidudahan nga miyembro sa puwersa sa gobyerno.

Milimod ang biktima ug ang iyang uyab apan giposasan sa mga lalaki ang sundalo ug gidala sa wala matinong lugar.

Miaksiyon og pangayo og tabang ang uyab sa biktima ngadto sa barangay kapitan sa maong lugar apan gibabagan siya sa usa sa tulo ka lalaki ug gihatud sa gipuy-an niyang boarding house.

Buntag niadtong Miyerkules, sa dihang nakit-an ang biktima sa usa ka sagbutan nga bahin duol sa boarding house sa iyang uyab nga nagkadugo ug nangayo'g tabang.

Nakahiagom ang biktima og mga samad pinusilan sa walang tuhod, tuong pulso ug sa ulo nga bahin.

Sumala pa sa biktima nga gisukitsukit siya sa mga lalaki ug gipusil sa tuhod ug sa pulso.

Sa dihang natumba na siya, gitiwasan siya og pusil sa ulo.

Nagpakaaron-ingnon siyang patay na hinungdan nga gibiyaan siya sa mga lalaki.

Daling gidala ang biktima sa Isaac Robillo Memorial Hospital sa Calinan apan gibalhin siya sa Camp panacan Hospital.

Nasayran nga miyembro ang mga mipusil sa sundalo sa Pulang Bagani Command 1 sa NPA nga gipangulohan ni Kumander Ryan. (Blue Cordero)