2 bomba mibusikad sa North Cotabato

KIDAPAWAN CITY - Duha ka mga pagbuto sa bomba ang nahitabo sa probinsiya sa North Cotabato alas 8:20 sa gabii niadtong Biyernes.

Nasayran gikan kang Cotabato Police Provincial Office director, Senior Superintendent Cornelio Salinas, nga ang unang pagbusikad nahitabo sa dihang gilabay og granada ang Quaknet Internet Cafe didto sa kanto sa mga dalang Bonifacio ug Rizal Avenue, Barangay Poblacion sa siyudad sa Kidapawan.

Hinuon way namatay o naangol sa pagbusikad gumikan kay wala nay tawo niadtong tungura.

Apan nakaangkon og danyos ang pagbusikad tungod kay nabungkag ang atop nga bahin sa Internet cafe.

Ikaduhang pagbusikad nahitabo pipila ka gutlo human mibuto ang granada.

Usa ka improvised explosive device (IED) nga gama sa bala sa 60 mm mortar ang mibusikad duol sa bagsakan og gulay didto sa Purok 13, Barangay Poblacion, Mlang.

Gumikan sa kakusog sa bomba, nangabuak ang salamin sa mga bay nga duol sa nahitaboan apan suwerte na lang nga way naigo nga mga tawo niadtong tungura.

Nasayran nga una nahitabo ang pagpamomba duna nay mikatag sa text messages nga dunay mga IEDs ang pabuthon sa merkado publiko, simbahan, eskuwelahan ug bus terminal sa North Cotabato.

Nagtuo si Cotabato Governor Emmylou Mendoza nga ang maong hitabo hinimoan sa mga nagsuporta sa kawsa sa Bangsamoro Islamic Freedom Movement.

Gihugtan na sa kasamtangan sa militar ug kapulisan ang seguridad sa probinsiya batok sa hulga sa mga dautang grupo. (Edgardo Fuerzas)