Giluba patay, nakuhaa'g pusil

PATAY ang wala pa mailhing lalaki human giluba alas 3:15 sa kaadlawon kagahapon didto sa kilid sa Mercury Drugstore sa dalang Marfori, Bankerohan, siyudad sa Davao.

Ang biktima gihulagway nga nagsul-ob og itom nga t-shirt, checkered nga short pants, anaa sa 5'4 hangtud 5'5 ang gitas-on, 20 hangtud 25 ang pangedaron ug kasarangan lang ang panglawas ug pamanit.

Sa spot report ni Senior Police Officer 1 Ronilo Tirasol sa San Pedro Police Station, nasayran base sab sa pamahayag sa usa ka saksi nga nagbaktas ang biktima sa maong lugar sa dihang nahitabo ang pagpangluba.

Sumala pa nga kalit lang giduol ang biktima sa nag-inusara sab nga mamumuno ug gihansakan sa likod nga bahin gamit ang kutsilyo.

Nakahiagum ang biktima og daghang samad dinunggaban sa iyang likod maoy gituohang hinungdan sa hinanali niyang kamatayon.

Yano lang nga naglakaw ang suspetsado nga misibat human ang panghitabo padulong sa wala matinong lugar.

Sa dihang gihiling sa kapulisan ang patay'ng lawas sa biktima, nakuhaan siya og usa ka magnum nga kalibre .22 nga rebolber.

Gilantaw karon sa kapulisan nga pagpanimalos ang motibo sa maong hitabo.

Patay nga lawas sa biktima gihatud na sa Angel Funeral Homes sa dalang Torres ning siyudad sa Davao. (Blue Cordero)