Wanted misukol sa pulis, patay

PANABO CITY - Gideklarang patay na nga miabot sa balay tambalanan ang usa ka pinangita sa balaod sa dihang misukol sa mga pulis alas 5 sa hapon niadtong Biyernes didto sa Poblacion.

Sa taho ni Police Officer 2 Randy Sta. Maria, imbestigador sa Panabo City Police Station (PCPS), nasayran nga dakpon na unta sa mga pulis si Jandy Kier Sarabia apan kalit lang namusil sa makadaghang higayon gamit ang .38 kalibre nga rebolber.

Apan daling nakalihay ang mga pulis sa nagpungasi nga mga bala ug mibawos sa pagpusil ni Sarabia hinungdan sa iyang kamatayon.

Ang suspek naigo sa walang aping sa nawong ug gidali sa paghatud sa Somozo Hospital apan gideklarang patay na.

Nasayran nga si Sarabia dunay warrant of arrest tungod sa kasong theft nga giatubang nga nakadoket criminal number 7955.

Narekober sa kapulisan sa nahitaboan ang usa ka .38 kalibreng rebolber ni Sarabia, uban sa tulo ka basiyo ug laing duha ka mga buhing bala sa .38 rebolber, usa ka basiyo sa kalibre .45 nga pistola, usa ka balines niini ug pares sa Islander nga tsinelas.

Patay'ng lawas ni Sarabia gidala sa Rivera Funeral Parlor sa siyudad sa Panabo. (Teddy Cabana)