Balay sa kapitan gisulong, 1 patay

KIDAPAWAN CITY - Usa ang patay sa pag-atake sa mga armadong grupo alas 9:10 sa gabii niadtong Sabado didto sa probinsiya sa Cotabato.

Namatay mao si Nasruddin Abas, 37, minyo, Barangay Tanod ug molupyo sa Sitio Kajam, Barangay Olandang, Midsayap.

Gibutyag ni 6th Infantry Division Public Affairs Chief Colonel Prudencio Asto nga gisulod sa grupo ni Kumander Nasser Tayuan sa Moro National Liberation Front (MNLF) ug Kumander Gibo Simpal sa Moro Islamic Liberation Front (MILF) ang balay ni Barangay Chairman Moneneng Masukat.

Daling nakabantay ang mga Barangay Tanod ug Civilian Volunteer Organization (CVO) nga miresulta sa 30 minutos nga pinusilay tali sa duha ka pundok gamit ang mga tag-as nga kalibre sa armas.

Miatras ang grupo sa magparyenteng sila Tayuan ug Simpal dihang nagsingabot ang pwersa sa 40th Infantry Battalion Philippine Army.

Patay sa maong engkwentro si Abas samtang dili matino pila ang namatay sa MNLF ug MILF nga maoy nanulong sa naasoy nga dapit.

Target unta sa pag-atake mao ang bana sa kapitan nga si Datu Nor Masukat nga kaaway nila ni Tayuan ug Simpal gumikan sa bikil sa ilang pamilya bahin sa yuta nga ilang giugmad. (Edgardo Fuerzas)