Gisugo pagpatay, mitahan

KAPALONG, Davao del Norte - Boluntaryong mitahan sa iyang kaugalingon sa Kapalong Municipal Police Station ang usa ka lumad kinsa gisugo sa iyang silingan nga patyon ang usa ka barangay tanod.

Mitahan mao si Edol Mahirogo, 19, dunay live-in partner, lumad nga taga Talaingod, Davao del Norte ug kasamtangang nagpuyo sa Purok 11-B, Ilaboon, Maniki, lungsod sa Kapalong.

Giangkon ni Mahirogo nga gisugo siya sa iyang silingan nga si Vergilio Mahilum, 54, minyo, taga Datu Balong, San Isidro, Davao del Norte nga patyon si Ernesto Besagas, 50, minyo, nagpuyo sa maong dapit.

Suma ni Mahirogo nga makaduha na siya gisugo ni Mahilum nga patyon niya si Besagas, apan nagdumili siya tungod sa rason nga suod silang managhigala ug wala siyay nakitang sala ni Besagas.

Ang tanod gipasinglan ni Mahilum nga nakahilabot sa 18 anyos nga asawa ni Mahirogo nga si Mary Ann kinsa nanghimakak sab sa pasangil.

"Kaduha ko ana gisugo nga patyon nako si Yoyoy (Besagas), apan suod man mi ana mao nang akong gitug-an ang mando ni Mahilum nga nagselos kang Besagas. Ako ug akong asawa suod man sab," tug-an ni Mahirogo.

Ang asawa ni Mahirogo nagsulti nga namugos kaniya si Vergilio nga mangulitawo.

"Ginahatagan man ko ana niya og kwarta. Usahay P50 sa usa ka semana. Naunsa man nga tabanon man hinuon daw ko niya. Ug dili pod na tinuod nga nagpahilabot ko kang Yoyoy," sulti sa asawa ni Mahirogo.

Testigo sa pagsugo ni Mahilum kang Mahirogo mao ang iyang ugangan nga si Ana Diaras.

Si Diaras nakadungog usab nga misugo si Mahilum sa iyang umagad.

"Ako nadunggan gyud nga ipatira ni Mahilum si Yoyoy," pahayag ni Diaras.

Si Mahilum wa na maabti sa tigbalita nga misuway pagkuha sa iyang pahayag bahin sa maong mga alegasyon sanglit milakaw suma sa anak niining si Jemar, 24.

Tungod sa gihimo ni Mahilum, ang asawa ni Mahirogo ug ang tanod nga si Besagas mopasaka og kaso ngadto sa korte. (Teddy Cabana)