6 namaligya pekeng herbal, giposasan
-A A +ANi Blue Cordero
Monday, August 13, 2012
UNOM ka mga mangingilad ang nasikop pinaagi sa sumbong nga gipadangat sa Philippine National Police (PNP) Text Hotline niadtong Dominggo.
Nasikop ang mga mangingilad samtang namaligya ug Chinese medicines nga dunay pakapin nga numero sa Last Two didto sa Korner Bangoy ug Magsaysay Streets, siyudad sa Davao.
Nasikop alas 3:10 sa hapon sila Ruel Macaso, 39, ulitawo, taga Block 20, Lot 14, Phase 3, NHA, Bangkal; Mark Martinez, 25, ulitawo, taga Phase 3, Salvacion, Panabo City; Anne Cabahug, 43, dalaga, taga Block 4, Lot 5, Ulha Village, Ulas; Elsa Castro, 42, ulitawo, taga Block 20, Lot 14, Phase 3, NHA, Bangkal; ug Edna Capili, 33, dalaga, taga R. Castillo, Agdao ug Rose Pascual, 35, minyo, taga Purok 1, Barangay Matina Aplaya, ning siyudad.
Ang unom gisikop tungod sa usa ka sumbong nga gipaabot sa PNP Text Hotline kabahin sa modus operandi sa mga suspek nga mao ang pagpamaligya ug Chinese medicines nga walay legal nga papeles.
Gawas sa maong modus, suma sa reklamo, ilang pasaligan ang mga tawo nga modaug sa sugal nga Last Two pinaagi sa mga numero nga ilang gihatag.
Nakuha gikan sa posisyon sa maong grupo ang usa ka lamesa, dakong payong, tulo ka mga karton sa Dao Nong Chinese medicine, duha ka karton sa Bao Ji Wan, trese ka mga botelya sa Bao Ji Wan, usa ka karton sa Tung Hai Liver soft gel capsule ug mga kupon nga dunay mga numero sa Last Two.
Giandam na sa kapulisan ang kasong pagpangilad batok sa mga suspek didto sa korte.
Gipatik sa mantalaang SuperBalita Davao Agosto 14, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
