Drayber og motor nabanggaan, patay
-A A +ASaturday, August 18, 2012
BANSALAN, Davao del Sur -- Patay ang usa ka drayber og motorsiklo human magbangga sa trak didto sa Barangay Marber sa maong lungsod.
Ang insidente nahitabo alas 3:30 sa hapon niadtong Biyernes, sumala ni Senior Inspector Milgrace Driz, hepe sa Bansalan Police Station.
Ang drayber nga namatay giila nga si Esmell Magbanua Delgado, molupyo sa Barangay Poblacion Antipas, North Cotabato.
Gibutyag ni Driz nga nalambigit sa aksidente mao ang usa ka Bajaj Kawasaki nga motorsiklo, nagbaton sa plakang GTE 481 nga narehistro sa ngan ni Maribeth Delgado, molupyo sa Barangay Poblacion Antipas, probinsiya sa North Cotabato ug ang usa ka Isuzu Elf truck.
Nilutaw sa imbestigasyon ni PO3 Angelito Alanano, traffic investigator, nga nisuway pag-una sa laing sakyanan ang motorsiklo apan nabalintong siya sa pikas tampi sa kalsada ug didto milagpot sa Elf truck hinungdan nga naligsan.
Ang insidente niresulta sa hinanaling kamatayon ni Delgado, asoy ni Alanano.
Hinuon, ang drayber sa trak boluntaryong nitahan sa iyang kaugalingon didto sa Kinuskusan Police Outpost sa maong lungsod ug gikustodiya na sa kapulisan. (Orlando B. Dinoy)
Gipatik sa mantalaang SuperBalita Davao Agosto 19, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
