Kisan Lu Lands: Kampeyon sa Pamulak sa Dalan 2012
-A A +ASunday, August 19, 2012
LIBUAN ka mga tawo ang midagsa sa gihimong Pamulak sa Dalan o Floral Float Parade, usa sa highlight sa Kadayawan Festival 2012 kagahapon.
Luyo sa naglagiting nga kainit sa adlaw, wa kini panumbalinga sa mga Dabawenyo ug mga bisita aron masud-ong lamang ang maanindot nga floats nga gidayan-dayanan sa bulak, prutas ug uban pang produkto gikan dinhi sa siyudad.
Ang Kisan Lu Lands Inc. maoy midaug sa large category nga mibitbit og P500,000.
Samtang second place and International Pharmaceutical Inc., (IPI) nga may P300,000 nga premyo ug P100,000 sa ikatulong pwesto nga nakuha sa Davao Merchant Maritime Academy (DMMA).
Ang Agdao Multi Purpose Cooperative, Samal City Resort Owners Association ug RDL Pharmaceutical Laboratory Inc., ang anaa sa ika-upat ngadto ika-unom nga pwesto.
Luyo sa top 3, may duha sab nga makadawat og tag P5,000 isip consolation prize.
Sa small category, ang Villa Foundation maoy nanguna nga may P150,000 nga ganti.
Nabutang sa ikaduha ang Synnex Concentriz Corp. nga midaug og P100,000 samtang 3rd placer ang Sr. Sto. Nino De Davao nga may P50,000.
Duha ka consolation prizes sab nga balor og P25,000 ang gitunol.
Samtang sa non-motorized category ang Davao Horse Club ang nagmadaugon nga may P50,000.
Misunod ang Dingredients nga miangkon og P25,000, ikatulo ang Barangay Councilor League of the Philippines-Davao Chapter nga milabni sa P10,000 nga premyo.
May duha ka consolation prizes sab nga tag-P5,000 ang usa.
Mga piniling hurado sa floral float parade mao sila Bissie Badilla, MJ Lastimosa, Annabelle de Leon.
Karon nga tuig, anaa sa 89 ang entrante sa Pamulak sa Kadalanan, kini mas ubos sa nakalabay nga tuig nga 115 kabuok.
Nauna nang gikabutyag ni Orly Escarilla, official spokesperson sa Kadayawan sa Dabaw Festival 2012, nga ang pagkunhod sa ihap sa partisipante dunay daghang rason, pipila dinhi mao ang nausab nga guidelines sa kompetisyon, anaa sab ang uwahing pag-anunsiyo labot sa mas gipatas-an nga premyo.
"Kung naka-balo lang siguro ang uban ug sayo-sayo, basig mas daghan pa siguro ang mga participants, dili baya ana ka dali para mag mangandam," ni Escarilla.
Sa 89 nga misalmot, 23 ang competing floats samtang 66 ang non-competing entries.
Ang Pamulak maoy finale sa kasaulugan sa Kadayawan Festival. (Rhona O. Goc-ong)
Gipatik sa mantalaang SuperBalita Davao Agosto 20, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
