Robredo giilang maayong lider sa mga Dabawenyo

SI LOCAL Local Government Secretary Jesse Robredo gilantaw sa kadaghanan nga usa ka maayong lider ug mentor sa mga local chief executives kinsa iyang nakatrabaho sa milabay nga mga tuig.

Ang kalihim nagpabilin nga missing Dominggo sa hapon human nahagsa ang iyang gisakyan nga eroplano sa kadagatan sa Masbate niadtong Sabado sa hapon.

Si Compostela Valley Representative Ma. Carmen Zamora nahinumdom sa mga panahon nga iyang nakatrabaho ang kalihim pipila ka higayon.

"I have met and worked with Sec. Jesse Robredo in a number of meetings and consultations -- he is a very attentive man, takes into account everybody's input, and will always do his best to help," tipik sa pahayag ni Zamora.

Si Compostela Valley Governor Arturo Uy namahayag sab nga usa ka maayong kalihim sa DILG si Robredo nga nahimo nilang resource speaker sa workshop sa Seal of Good Housekeeping for LGUs.

Si Sarangani Governor Miguel Rene Dominguez nahinumdom sab sa iyang unang pakigkita kang Robredo nga iyang gikonsidera nga mentor sa serbisyo publiko.

"He was a mentor who first introduced education reform in 2006 to Sarangani," sulti ni Dominguez.

Si Davao City Mayor Sara Duterte nahinumdom sab dihang nangayo siya og pasaylo kang Robredo human nasumbagan niya si Sheriff Abe Andres.

Alang sa mayor, usa ka maayong opisyal si Robredo nga iyang nakauban sa Araw ng Pagadian niadtong miaging tuig. (Ben O. Tesiorna)