Lalaki nakigpinusilay sa kapulisan, napatay
-A A +AMonday, August 20, 2012
DAVAO DEL NORTE -- Patay ang usa ka lalaki human naigo sa ulo ug lawas sa mga bala sa armalite rifle human siya nakigpinusilay sa mga pulis didto sa Purok 20, Veteran Village, Barangay Tibal-og, lungsod sa Sto. Tomas.
Si Senior Police Officer (SPO) 2 Felipe Moquiala, imbistigador sa Sto. Tomas Municipal Police Station, miila sa namatay nga si Allan Montalban, 34, dunay live-in partner, molupyo sa maong dapit.
Sa imbistigasyon ni Moquiala, nasayran nga alas 5:30 sa hapon niadtong Sabado, human madawat sa kapulisan ang taho nga dunay nag-away nga magtiayon, dali silang miresponde nga gipangulohan ni SPO2 Jovanie Infante.
Dihang miabot na sila sa lugar, suma sa report, gisugat sila ni Montalban bitbit ang usa ka .38 kalibre nga rebolber dayon gipusil ang mga pulis.
Si PO2 Alter Paloma kinsa unang nakakita sa suspek nga nagtion kanila, abtik nga mikablit sa gatilyo sa iyang armalite rifle hinungdan sa kamatayon sa biktima.
Gihaya na ang biktima sa lokal nga punerya sa maong lugar. (Teddy Cabana)
Gipatik sa mantalaang SuperBalita Davao Agosto 21, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
