Managsuon giluba, naospital

SULOP, Davao del Sur -- Nasamdan ang duha ka managsuon lakip ang ilang kauban dihang natripingan og tulo ka mga batan-on samtang naglakaw pauli sa panimalay.

Ang mga biktma giila nga sila Melchor Arendain, 29, ulitawo ug ang magsuon nga sila si Rodelo, 32; ug Raul Rasola, 30, puros panadero ug mga molupyo sa Purok 3, Barangay Poblacion.

Subay sa inisyal nga imbistigasyon sa kapulisan, nahitabo ang insidente alas 6:45 sa gabii niadtong Dominggo.

Wa sila magdahum nga sa ilang pagbaklay sa dalan, ilang masugatan ang tulo ka mga batan-on nga sila Julius Estansya 18; ug magsuong Alexander, 18, ug Reco, 16.

Way daghang rason nga nagpasingit ang mga suspek ngadto sa mga biktima mao nga niresulta sa rayot.

Mga suspek nagpalaban sa ilang dalang kutsilyo ug namuak og mga botelya dayon gihansak ang mga biktima kinsa pulos nahiagom og daghang samad sa nagkadaiyang parte sa kalawasan.

Human sa insidente, paspas nga misibat ang mga suspek apan mas abtik kanila ang kapulisan hinungdan nga sila nasikop sa grupo ni Police Officer 2 Nathaniel Millado.

Ang mga biktima padayong gitambalan sulod sa Davao del Sur Provincial Hospital (DDSPH) samtang ang tulo ka mga suspek nagtingkagol sa prisohan.

Gitakdang atubangon nila ang kasong ipahamtang sa korte gawas sa menor de edad nga si Rico anglit itunol kini ngadto sa Municipal Social Welfare and Development (MSWD). (Orlando Dinoy)