2 bata nalitson

KIDAPAWAN CITY - Duha ka bata ang napatay sa sunog alas 7:45 sa gabii niadtong Lunes didto sa probinsiya sa Cotabato.

Giila ang mga biktima nga sila Nicole Alquino, lima ka tuig ang pangedaron ug iyang manghud nga si Sokate, tulo ka bulan, pulos nagpuyo sa Habitat Village, Barangay Sadaan, Midsayap.

Gibutyag ni Cotabato Police Provincial Director Sr. Supt. Cornelio Salinas nga ang mga biktima lamang ang nahibilin sa ilang bay gumikan dunay gipalit ang ilang inahan sa tindahan nga nahimutang sa unahan lamang sa ilang gipuy-an.

Namatikdan na lamang sa mga silingan sa mga biktima nga kalit midilaab ang dakong kalayo sa ilang bay.

Nagtinabangay ang mga tawo aron luwason ang duha ka bata apan gumikan sa kadako sa kalayo, pakyas sila sa ilang tinguha.

Miabot sab dayon ang mga ginsakpan sa Bureau of Fire Protection (BFP-Midsayap) diin wala na makatabok sa ubang bay ang kalayo.

Sa inisyal nga imbestigasyon, migawas nga nahug ang lampara nga gibutang sa altar ngadto sa gikatulugan sa mga biktima nga maoy hinungdan sa sunog.

Naglampara ang pamilya tungod kay bag-o lang silang giputlan sa linya sa kuryente gumikan kay duha ka bulan na silang wala makabayad sa Cotabato Electric Cooperative.