Hubog miambak sa dagat, patay nang nakaplagan

DIGOS CITY - Patay nang nabangalan ang usa ka batan-on human nalumos sa dagat atol sa ilang pagkaligo kuyog ang pamilya didto sa Barangay Aplaya niadtong Lunes.
Ang biktima giilang si John Glenn Aligonero, 22, ulitawo ug molupyo sa Barangay Bugong, lungsod sa M'lang, probinsya sa North Cotabato.

Sa inisyal nga imbistigasyon sa kapulisan, giingon nga lango sa ilimnong makahubog ang biktima ug nagkasinabot sa iyang mga ig-agaw nga mosakay og bangka paingon sa lawod.

Nasayran nga sa ilang pagbalik, miambak ang biktima sa baybayon tungod sa pagtuo nga mabaw lang ang tubig.

Mikapyot sa katig ang biktima, apan gibadlong siya sa tag-iya sa bangka nga di gunitan aron di sila malunod.

Tungod niini, napugos ang biktima sa paglangoy aron makaabot sa baybayon, apan kalit siyang nalunod sa dagat mao nga gitabang siya.

Miabot na lang ang kagabhion, wa gihapon siya nakita sa mga sakop sa City Disaster Risk Reduction Council (CDRRMC) aron maluwas ang biktima.

Ang biktima naglutaw nang nakaplagan sa mga rescuers human sa walo ka oras nga pagpangita.

Pahimangno sa mga otoridad nga likayan nga magkiat samtang maligo sa dagat sanglit daghan nang kinabuhi ang nakalas sa lugar. (Orlando Dinoy)