Gang leader gipusil sa pulis, kritikal

KRITIKAL ang kahimtang karon sa usa ka gang leader kinsa napusilan sa mga pulis kinsa iyang gipusil alas 4:40 sa hapon niadtong Lunes.

Napusilan mao si Noel Camerino, alyas Tonton, 18, pangulo sa Thugs Gang, nagpuyo sa Sodaco, Barangay Lizada, Toril District, siyudad sa Davao.

Ang spot report sa Toril Police Station nagbutyag nga naalarma ang katawhan sa maong lugar tungod kay ilang nakita nga nagbitbit og armas si Camerino.

Tungod niini, suma sa report, nangayo og police assistance ang mga residente mao nga miresponde sila Senior Police Officer 1 (SPO1) Cunanan ug SPO1 Olano sa Mobile Patrol 46.

Sa paghiabot sa kapulisan, gigukod sa mga pulis ang suspek apan milanit siya sa dalang armas dayon gipusil ang mga pulis.

Ang pagpapusil sa suspek ngadto sa kapulisan maoy nagtukmod kanila nga pusilon na lang ang suspek kinsa naigo sa iyang dughan ug bukton.

Bisan nasamdan na ang suspek, nakadagan gihapon siya paingon sa ilang balay mao nga gidala siya sa Mediquest Hospital sa Toril.

Sanglit grabe ang iyang kahimtang, gibalhin siya sa Southern Philippines Medical Center.

Nakuha sa kapulisan ang usa ka sumpak nga maoy gigamit sa suspek kinsa giingon nga kanunay nang napriso sa Toril Police Station tungod sa nagkadaiyang kaso. (AD)