Molupyo namakwet

KIDAPAWAN CITY - Gatusan ka mga molupyo sa North Cotabato ang namakwet alas 2 sa hapon niadtong Martes didto sa probinsiya sa Cotabato.

Kadaghanan kanila nagagikan sa mga hilit nga dapit sa munisipyo sa Pikit ug Aleosan, ilabina kadtong namuyo duol sa mga kampo sa militar nga target nga atakihon sa mga miyembro sa Bangsamoro Islamic Freedom Movement (BIFM) nga gipangulohan ni Kumander Ustadz Ameril Umbra Kato.

Apil sab sa mga mihikling kadtong namuyo sa mga utlanan sa North Cotabato ug Maguindanao, ilabina sa Cotabato-Davao Highway nga target sab atakihon sa BIFM.

Kahinumdoman nga nagbahad si BIFM spokesman Abu Misry Mama nga molusad na usab sila og halapad nga pagpangatake pagkahuman sa Ramadan.

Namatikdan sab sa mga sibilyan nga nagtapok-tapok ang pundok ni Kato duol sa Liguasan Marsh.

Gumikan niini, nagpakatag og daghang puwersa sa militar si 6th Infantry Division chief, Major General Rey Ardo sa mga lugar sa North Cotabato nga posibling target nga atakihon sa mga rebelde. (Edgardo Fuerzas)