Sundalo gipatay sa nagsakay og motor

PANABO CITY - Patay ang usa ka sakop sa Philippine Army human gipusil makadaghang higayon sa usa ka lalaki nga naka-motorsiklo ala 1 sa kaadlawon kagahapon didto sa duol sa Carmelite Hospital, Barangay San Francisco ning siyudad.

Ang biktima giila nga si Corporal Ryan Lacbayo Calamba, 31, minyo, molupyo sa Suaybaguio, Barangay Magugpo North, Tagum City.

Si Calamba nahisakop sa 20th Infantry Batallion sa 8th Infantry Division sa Philippine Army ug kasamtangang nag-part time driver sa Forward truck nga gipanag-iyahan sa La Paz Company.

Nasayran nga si Calamba gikan sa siyudad sa Tagum ug paingon na unta sa Bankerohan, siyudad sa Davao kay dunay ihatud. Apan mihunong siya makadiyot duol sa Carmelite Hospital aron nga mopalit og balot.

Apan kalit lang nga dunay usa ka lalaki nga sakay og motorsiklo ug miluthang kaniya gamit ang kalibre .45 nga pistola tumong sa lawas.

Misibat gilayon ang suspetsado human ang pagpamusil.

Gisuwayan pa pagdala ang biktima ngadto sa Rivera Hospital apan gideklarang patay na siya paghiabot sa tambalanan.

Sa paghiling sa lawas, nasayran nga gikamatay sa sundalo mao ang duha ka mga igo ibabaw sa iyang tiyan, ibabaw sa dughan ug usa pa ka samad sa likod nga bahin.

Nahipus sa mga otoridad ang duha ka basiyo ug usa ka slug sa kalibre .45 nga pistola sa nahitaboan.

Si Police Officer 2 Rean Lan Juan sa Panabo City Police Station mihimo na og dugang imbestigasyon aron masayran unsay motibo nganong gipatay ang sundalo. (Teddy Cabana)