2 taksi dunay managsama nga plaka giimbestigahan

MIHIMO na karon og imbestigasyon ang Land Transportation Office (LTO) bahin sa duha ka mga taksi nga managsama og numero sa plaka.

Kini human nga mga personahe sa Traffic Management Center uban sa abag sa Task Force Davao (TFD) ug sa Sasa Police Station nasiplatan ang duha ka mga taksi didto sa entrada sa Francisco Bangoy International Airport niadtong Miyerkules sa buntag.

Sa dihang nahinabi, gikanayon ni TMC retired Colonel Desiderio Cloribel nga ang duha ka mga taksi nga gipanag-iya sa usa ka Enero Ruperto Jr. tua na sa LTO alang sa pagsusi sa serial number ug chassis number. Dugang pa niya nga ila sab nga susihon kon ang operator sa Goldview taxi units dunay ideya sa modus sa pagbalhin og plaka sa taksi.

Dugang ni Cloribel nga si Ruperto mahimong mag-atubang og kaso sa paglapas sa Republic Act 4136, labing nailhan isip An Act To Compile The Laws Relative To Land Transportation And Traffic Rules, To Create A Land Transportation Commission And For Other Purposes.

"As far as I know, he would not only face an administrative charges but also criminal charges. It would depend on the result of the investigation," tin-aw ni Cloribel kinsa dugang nagkanayon nga di lang kini maoy unang higayon nga sila nakadakop og mga sakyanan nga dunay managsama og plaka.

Miapela sab si Cloribel sa publiko nga magbinantayon kanunay ug mokontak gilayon sa Central 911 kon dunay masiplatan nga susama niini nga insidente. (ICT)