4 grupo sa mga 'gun for hire' nailhan na

TAGUM CITY - Natumbok na sa kapulisan ang giingong upat ka hugpong sa "gun for hire" nga nagpaluyo sa sunod-sunod nga pagpamusil sa dakbayan.

Kini maoy gitug-an ni Police Superintendent Rimas Lambert, hepe sa Tagum City Police Station, sa dihang mitambong sa gihimong regular session sa Sangguniang Panlungsod sa Tagum niadtong Miyerkules.

Matud ni Lambert nga ila nang gimonitor karon ang upat ka mga grupo nga gun for hire nga giingong nalambigit sa mga kasong pagpamusil.

Hinuon, wala gibutyag sa hepe ang mga pangalan sa grupo ug ang nangulo niini.

"We already monitored this group ug padayon sila nga ginasubaybayan sa atong mga sakop," pasalig ni Lambert.

Nasayran nga si Lambert giimbitahan sa mga miyembro sa SP aron nga mo-esplikar bahin sa nahitabong mga pagpamusil patay sa siyudad nga hinimoan matud pa sa armadong mga nakamotorsiklo.

Sumala pa nga gikabalak-an nga mapalagpot sa puwesto si Lambert kon di niya masulbad ang pagpamatay sa dakbayan.

Apan gipasalig ni Lambert nga bisan nag-una sa listahan sa daghang kaso sa gitawag nga "crime against person" ang siyudad nagpabilin kining kontrolado sa kapulisan ang kahapsay ug kalinaw niini.

"The City remains peaceful despite the crimes against in person," pasalig ni Lambert.

Usa sa mga nabalaka sa pagpamatay mao si City Councilor Tristan Royce Aala kon diin giingong mga nalambigit sa pagpamatay mao ang "hired killers" nga nakabase sa siyudad. (Teddy Cabana)